09-06-2010  Marnar Djurhuus vann gull í Svøríki

Í vikuskiftinum hevur 15-ára gamli Marnar Djurhuus úr Treysti luttikið í stórari kapping í frælsum ítrótti í Svøríki
    
Marnar uttast til vinstru klárur til start á 2.000m á Sävedalen Stadion

Í vikuskiftinum hevur Marnar Djurhuus úr Treysti luttikið í stórari kapping í frælsum ítrótti í Sävedalen, sum liggur beint uttanfyri Gøteborg í Svøríki. Marnar var úttikin til at umboða VestDanmark (Jylland og Fyn) saman við 42 øðrum donskum íðkarum í aldrinum 14-15 ár. Marnar luttók á 2.000m og 800m teininum.
 
Lat tað verða sagt beinanvegin, at tað gekk sera væl hjá Marnari í hesi kapping, tí hann kom aftur við tveimum heiðursmerkjum. Eitt gull og eitt silvur. Gullið vann hann á 2.000m teininum og silvurið á 800m teininum.
 
Leygardagin kl. 19 var 2.000 m á skránni. Og her gekk nógv betur enn væl og nógv betur enn nakar tordi at gita og vænta. Ikki bara vann Marnar kappingina við fantastisku tíðini 5.53,92 min.! Hetta var samstundis bæði nýtt stevnumet, føroyskt bólkamet og bólkamet hjá Vejle IF, sum Marnar umboðar, tá hann rennur fyri DAF (Dansk Atletik Forbund). Málið hjá Marnari undan kappingini var at koma so langt niður móti 6 minuttum sum gjørligt.
 

Guttorm Sørensen, íð er venjari hjá Marnari, var við á túrinum, sum ein av ferðaleiðarunum. Hann sigur, at hetta var ein ótrúliga góð og spennandi kapping. Á 2.000m teininum skulu rennast fimm umfar á breytini. Marnar legði seg á odda eftir fyrsta umfar og næsta umfar. 

  
Marnar á odda eftir tvey umfør 

 

Ferðin fór nakað niður eftir tvey umfør og tá komu so tveir sviar framum næstu tvey umførini, har Marnar og ein dani fylgdu við nakrar metrar aftanfyri. Á seinasta umfari fekk Marnar fatur aftur á sviunum, og í einum braki av einum endaspurti blivu hesir settir væl og virðiliga upp á pláss á teimum seinastu metrunum áðrenn málstrikuna.

 


Marnar, her á triðjaplássi 60m áðrenn málstrikuna, hevur sett endaspurtin inn

 

Sunnudagin kl. 14. bert 19 tímar eftir framúrskarandi avrikið á 2.000m, var seinna kappingin hjá honum á skránni. Rennast skuldu 800m. Tað var væntandi undan startinum, at avrikið frá degnum frammanundan fór at merkjast í beinunum, og so varð. Hóast veðrið var gott, so var tað eisini eitt fitt lot meðan runnið bleiv. Hóast hetta, so eydnaðist tað Marnari at renna seg til eitt silvurheiðursmerki við tíðini 2.08,96 min. sum er eitt petti frá hansara bestu tíð á teininum.

 

   
Marnar fekk bæði blómutyssi og serliga plátu fyri at seta stevnumet
    
Donsku leiðararnir vóru vælnøgdir við avrikið hjá Marnari og teimum donsku íðkarunum. Tað blivu íalt sett 45 persónlig met, og harumframt blivu vunnin 14 gull-, 17 silvur- og 16 bronsuheiðursmerkir tilsamans.    
            

Tað verður spennandi at fylgja við Marnari í summar, tí nógvar kappingar eru fyri framman, og longu 1. juli skal hann aftur til Gøteborg við Talentbólkinum hjá FÍF, sum fer at luttaka í VärldUngdoms-spelen.

 

    
Tveir vælnøgdir Treysta-menn á Sävedalen Stadion eftir framúrskarandi avrikið hjá Marnari

 


Aftur